八方問董橋社長對新社長肥佬黎有乜忠告,董社講笑咁話:「醒定啲!」何柏佳攝
帶領《蘋果日報》走過16個年頭嘅董橋社長榮休,噚日最後一日返工,同事們為社長搞咗個歡送會,送上蛋糕、鮮花之餘,仲排晒長龍合照、兼搵董社喺佢最後一篇《蘋果樹下》作品上簽名留念。
黎社上任感言:低調啲
董社榮休,同事問佢對繼任人有乜忠告或錦囊。董社笑言:「醒定啲!」獲董社臨別叮嚀嘅新社長,即係肥佬黎,噚日都有現身歡送會,仲同埋同事一齊同董社影相。
八方之後想話訪問「黎社」幾句上任感言,可惜佢耍手擰頭,頻說「低調啲、低調啲」。
噚日歡送會嘅焦點之一,就係個重13磅嘅大蛋糕。呢個蛋糕以《蘋果日報》頭版A1做設計,實物原大㗎,蛋糕仲寫上「蘋果樹上 碩果纍纍」同「社長,謝謝您!」。
蛋糕一出場,同事無不嘩嘩聲,事關整得十分精緻,《蘋果》個報頭、《蘋果樹下》棵蘋果樹,都似到不得了,連個報料熱線電話都有。喺呢個時候,當然係相機(手機)食先啦,同事對住個蛋糕影相影唔停。
呢個《蘋果》A1實物原大嘅蛋糕,整得十分精緻,成為歡送會嘅焦點。
《蘋果》管理層及部門主管為董社搞咗個歡送會,送上蛋糕及鮮花。
臨別在即,各部組同事同董社影相留念。
沙膽虹獻甜酒配蛋糕
老總沙膽虹就拎出兩支法國DOMAINE OGEREAU甜酒,仲話食蛋糕一定要配甜酒,「唔通飲白酒咩?」
同事們依依不捨,紛紛上前同董社握手,互道「珍重!」董社退休之後可以享受生活,讀鍾意讀嘅書、繼續寫文章。董社仲透露,今後會每寫四、五萬字先結集成書,令人期待。八方都喺度向董社說聲,此去山青水綠,珍重千萬。